На хрватскиот полуостров Пељeшац се наоѓаат чудесни средновековни ѕидини, кои после Кинескиот ѕид, се најдолгиот зачуван фортификациски систем во светот.
На вториот по големина полуостров во Хрватска се наоѓа Стонскиот Теснец кој го поврзува Пељeшац со копното. Прекрасниот Пељeшац е познат по бродарството, сол, вино и одгледувањето школки, но и по ѕидовите кои, по Кинескиот ѕид, се најдолгиот зачуван фортификациски систем во светот. Стонските ѕидини се вистинско чудо на средновековната архитектура.
Во 14 век, Република Дубровник го купила полуостровот Пељeшац од српскиот крал Душан, подоцна цар Душан Силниот. За да се заштити од непријателските напади, одбранбениот ѕид го продолжила низ целата ширина на полуостровот зацврстувајќи го со кули и полукружни бастиони.
Овој Европски кинески ѕид, ремек-дело на средновековната архитектура, бил вкупно долг дури 7 километри. Околу 40 кули и 5 тврдини, од кои главната била Бартоломија, именувана по заштитникот на оружјето, Св. Вартоломеј, покрај другото, чувале и вредни садови сол кои на Добровничката Република ѝ донеле многу пари. Солта се вадела уште од римско време, а луѓето од Дубровник изградиле солана. Производството на сол се одржува до денес.
„Според постарите дубровнички хроники, изградбата на Големиот ѕид траела 18 месеци и чинела 12.000 дукати. Утврдувањето Стонски корпус било обликувано во текот на повеќе од четири века. Наменет првенствено за одбрана на полуостровот од неговата копнена внатрешност, тој постепено се подобрувал и прилагодувал на теренот и развојот на воената опрема“, наведува Туристичкиот одбор на Општина Стон.
Иако дел од ѕидовите биле уништени во земјотреси и битки, Стонските sидони со своите 5,5 километри сè уште се најдолгите одбранбени sидови во Европа. Од 2009 година се отворени за посетители, а турнејата трае околу 40 минути ако се одлучите за подолга турнеја помеѓу Стон и Мал Стон. Пократката турнеја трае околу 20 минути и започнува и завршува во Стон на пентагоналните sидови што го опкружуваат градот.
Погледот што се отвора кон морето, покривите и крошните вреди за секој чекор. „Европскиот кинески ѕид“ е неверојатно место проткаено со историја што сè уште гордо ги чува овие предели.