Тренерот на Милан, Стефано Пиоли, го пофали Златан Ибрахимовиќ, велејќи дека фудбалерот е професионалец за пример.
Милан вчера го победи Интер со 2: 1 со двата гола на Ибрахимовиќ, додека голот за домашниот тим го постигна Ромелу Лукаку. Ибра синоќа стана најстариот играч кој погодил во Дерби дела Мадонина, со 39 години и 14 дена.
Ибрахимовиќ се опорави од коронавирусот непосредно пред дербито и го одигра целиот натпревар на врвно ниво.
„Беше многу уморен, дури и побара да излезе, но овојпат го игнорирав. Златан е извонреден, тој носи многу на теренот со својот талент, решителност и карактер. Тој е професионалец за пример, дава сè за оваа екипа, сака во сè да победи, од финалето на Купот, до дуел на тренинг. Не можам да прифатам никаква заслуга за соработката со него, бидејќи тоа е многу лесно“, изјави Пиоли за Sky Italia.
На прашањето дали оваа победа претставува пресвртна точка во сезоната за неговиот тим, Пиоли рече: „Веќе реков дека овој натпревар нема да биде решавачки“.
Милан е прв на табелата со сите четири победи, а тимот прими само еден гол.
„Секако, задоволни сме што победивме квалитетен тим, игравме добро и возвративме кога имавме можност. Ова е важна победа, но ни претстои долг пат и мора уште многу да напредуваме“, изјави тренерот на "росонерите".
„Се боревме во второто полувреме, но издржавме и победивме, што покажува дека напредувавме, научивме од претходните грешки и научивме како да останеме фокусирани. Тимскиот дух е неверојатен, работиме напорно за своите цели. Победивме на секој натпревар оваа сезона во првенството, но ниту еден од нив не беше лесен, што значи дека треба да се подобриме тактички и технички, бидејќи не можеме секогаш да се потпреме на карактерот“, додаде тој.
На прашањето за борбата за титулата, Пиоли рече дека тимот е цврсто на земја.
„Сакам да размислувам позитивно, мислам дека сум оптимист, но исто така знам дека има најмалку три или четири клуба кои вложија повеќе од нас и кои се во понапредна фаза. Ние сме амбициозни, но вложивме многу во иднината“, рече Пиоли.
„Има седум клубови на високо ниво во Серија А, и само четири ќе имаат доволно среќа да се пласираат во Лигата на шампионите на крајот на сезоната. Ако сакате да се борите за Скудетото, мора да го подигнете квалитетот на тимот. Дури и тогаш, потребно е време, има тимови кои инвестираа многу повеќе од нас и не постигнаа толку добри резултати. Клубот мудро ги постави темелите и ги надгради за во иднина“, додаде Пиоли.