Најдобриот стрелец на Шкендија верува дека утре неговиот тим нема да се соочи со рана елиминација од Лига Европа и ќе продолжи во наредното коло.
Тетовска Шкендија утре со почеток во 18 часот по македонско време ја почнува европската сезона на гости против азербејџанскиот тим на Сумкај'т. Жрепката сакаше тетовци да играат како гости во единствениот натпревар според новите правила. Играчите како негативни ги минаа тестовите за COVID-10 и веќе се наоѓаат во кавказката земја.
„Во Азербејџан одиме мотивирани и со самодоверба дека ќе го поминеме првото коло. Се разбира, во никој случај не велиме дека задачата ќе биде лесна, бидејќи секој натпревар и секој ривал има свои тешкотии, но јас сметам дека имаме квалитет да одиграме на потребното ниво за да го добиеме резултатот што ќе нè квалификува“, вели Ибраими.
Некогаш најдобриот стрелец на тетовскиот состав беше во голгетерска криза која ја прекина на саботниот натпревар со Македонија Ѓорче Петров кога го постигна голот за победа. Но, не беше гол од акција, туку од белата точка, Сепак, гол како гол, за еден напаѓач е важен бидејќи мотивира.
„Живееме во тешки времиња, не само ние како фудбалска заедница, туку секоја активност ширум светот, без исклучоци. Пандемијата трае долго и да се биде толку долго надвор од нормалниот живот секако бара одредено време за човек да се врати во форма. Јас, исто така, лично го чувствувам тоа во моите настапи, но веруваме и работиме да ја најдеме вистинската форма. Голот против Македонија ЃП ме мотивира и убеден сум дека во Азербејџан ќе бидеме на висина на задачата за да поминеме“, заклучи Ибраими.
33-годишниот кичевчанец досега има одиграно 24 натпревари во квалификаците од Лига Европа на кои постигна 11 голови. Има и 5 голови на 8 натпревари во квалификациите за Лигата на шампиони.
