Илјадници луѓе ноќеска присуствуваа на комеморацијата на Афроамериканецот Џорџ Флојд, кој минатиот понеделник беше убиен од страна на полицаец во Минеаполис.
Познати личности, активисти за граѓански права, политичари, обични граѓани, пријатели и семејството на убиениот Флојд беа меѓу собраните на комеморацијата.
Тие му оддадоа почит на Флојд стоејќи во тишина осум минути и 46 секунди, времето колку што офицерот Дерек Шовен го држел коленото на вратот на жртвата.
Градоначалникот на Минеаполис Џејкоб Фреј, на почетокот на комеморацијата се појави на комеморацијата, клекна и плачеше крај ковчегот на Џорџ Флојд.
Телото на Џорџ Флојд е положено во златен ковчег опкружен со цвеќиња, а покрај неговиот портрет, зад присутните беше поставен мурал со неговиот лик, пренесува Guardian.
Адвокатот на семејството Флојд, Бенџамин Крамп изјави дека не сакаат два правосудни системи во САД, еден за црнците и еден за белците.
- Џорџ Флојд не го уби пандемијата на коронавирусот. Другата пандемија, што многу добро ја знаеме во САД, го уби Џорџ Флојд, пандемијата на расизмот и дискриминација, рече Крамп.
Комеморацијата во Минеаполис е прва во низата, бидејќи комеморативните собири ќе се одржат во уште во два града во САД.