Шефот на Tesla Motors, Илон Маск, вчера на Twitter вети награда од 100 милиони долари за развој на најдобрата технологија за ловење емисии на јаглерод диоксид.
Ловењето на штетните гасови кои предизвикуваат ефект на стаклена градина станува критичен дел од многу планови во борбата против климатските промени, но до денес е направен многу мал напредок во таа технологија, при што напорите се насочени кон намалување на емисиите наместо отстранување на јаглерод диоксид.
Меѓународната агенција за енергетика (IEA) кон крајот на минатата година соопшти дека е потребно нагло зголемување на примената на технологија во ловењето на јаглерод диоксидот, доколку земјите сакаат да ги постигнат целите за намалување на нето емисиите на нула.
„Давам награда од 100 милиони долари за најдобра технологија за ловење јаглерод диоксид“, напиша Маск на Twitter, проследен со уште еден твит во кој вети повеќе детали следната недела.
Маск денес управува со некои од најфутуристичките компании во светот. Покрај Tesla, тој ја води и SpaceX, како и Neuralink, стартап што го поврзува мозокот со компјутерите.
Американскиот претседател Џо Бајден вети дека ќе го забрза развојот на технологијата за ловење јаглерод диоксид како дел од неговиот сеопфатен план за борба против климатските промени.
