Извршниот директор на Tesla, Илон Маск, продаде 7,9 милиони акции на Tesla во последните денови, а од продажбата заработи 6,9 милијарди долари.
Серијата поднесоци до Комисијата за хартии од вредност откри неколку продажби од петок до вторник навечер.
Ова е прва продажба на акциите на Маск на Tesla од април, кога продаде 9,6 милиони акции, со што тогаш прибра 8,5 милијарди долари. Тие априлски продажби се случија веднаш откако Маск постигна договор за купување на Twitter за 44 милијарди долари.
Сепак, пред еден месец, Маск објави дека не планира да склучи договор за купување, тврдејќи дека менаџментот на Twitter не открил информации за тоа колку кориснички профили се ботови и спам профили, наместо профили управувани од вистински луѓе. Twitter брзо поднесе тужба за да го принуди Маск да продолжи со договорот според условите постигнати во април.
Распродажбата на акциите покажува дека Маск може да го загуби тој случај. Тој беше прашан на Twitter дали завршил со продажбата на акции на што тој одговори „Да“ и предупреди на можноста да биде принуден да го купи Twitter.
Тој нагласи дека е важно да нема итна продажба на акциите на Tesla во случај Twitter да го принуди да ја купи компанијата, а доколку тоа не се случи, вели дека е подготвен да ги откупи продадените акции.
