Капитенот на Наполи беше крајно нервозен откако неговиот тим синоќа одигра 3:3 на гостувањето кај Сасуоло и тоа со гол примен во 5-тата минута од надополнувањето.
Лоренцо Инсиње не го криеше својот бес по последниот свиреж и одејќи накај соблекувалните го шутна рекламното пано и викаше: 'Каков го*нарски тим', а италијанските медиуми сега нагаѓаат дали тоа се однесува на неговиот Наполи, или пак на противникот.
Наполи вчера на двапати губеше, 1:0 и 2:1, а потоа направи пресврт кога прво Инсиње му асистираше на Џовани Ди Лоренцо за 2:2, а во 90-тата минута од белата точка донесе водство од 2:3. Длабоко во надополнувањето, домашните израмнија на 3:3 исто така од пенал преку Франческо Капуто. Тоа беше втор пенал за Сасуоло на натпреварот, а двата ги предизвикаа Балканци: Албанецот Хисај и Гркот Манолас.
Инсиње постигна прекрасен гол и во 22. минута, но му беше поништен поради минимален офсајд.
Нашиот Елиф Елмас почна од гостинската клупа и влезе во игра на полувреме кога беше 2:1 за Сасуоло.
„Партенопеите“ со 44 бодови се шести, додека „Неровердите“ имаат 36 и се на 9. место на табелата во Калчото.