„Нераѕурите“ беа немилосрдни кон последната Бреша постигнувајќи 6 голови, Милан се изваде во Ферара со автогол во судиско, додека Фиорентина беше непријатно изненадена дома од Сасуоло.
Интер синоќа гневот од лошите игри и резултати го истури врз последнопласираниот тим на табелата, Бреша. Составот на Антонио Конте постигна по три гола во секое полувреме извоувајќи ја највисоката победа сезонава. Сите голови ги постигнаа различни играчи и тоа Ашли Јанг, Алексис Санчес од пенал, Данило Д'Амброзио, Роберто Гаљардини, Кристијан Ериксен и Антонио Кандрева.
Милан гостуваше во Ферара кај СПАЛ каде и покрај најавите сепак во тимот не беше Златан Ибрахимовиќ. Домаќините со головите на Матија Валото и Серџо Флокари уште по половина час игра водеа со 2:0, но пред полувремето црвениот на Марко Д'Алесандро ги исфрли од колосек. СПАЛ успешно се бранеше сѐ до 79. минута кога Рафаел Леау намали на 2:1, а драгоцената победа ја испуштија во судиското надополнување кога Франческо Викари си постигна несреќен автогол и го спаси Милан од срамен пораз.
Екипата на Фиорентина беше непријатно изненадена од Сасуоло на домашен терен. Грегоар Дефрел во првиот дел постигна два гола, а потоа Мерт Мулдур зголеми на 0:3 пред Патрик Кутроне да го ублажи поразот во последната минута.
Крајно интересен натпревар одиграа Верона и Парма постигнувајќи вкупно пет голови. Гостите поведоа преку Дејан Кулушевски, но Верона направи пресврт со головите на Самуел Ди Кармине од пенал и Матија Ѕакањи. Рикардо Гаљоло потоа израмни на 2:2, а победата за Верона ја донесе Матео Песина на 9 минути пред крајот.
Во останатите два натпревара синоќа Болоња и Каљари одиграа 1:1, а Сампдорија славеше на гости кај Лече со 1:2 каде, интересно, сите три гола беа постигнати од белата точка.
