Неверојатна приказна доаѓа од Италија и тоа за златната ера на Интер која кулминираше во 2010 година со освојувањето на Лигата на шампионите.
„Нераѕурите“ тогаш имаа страшен тим, а дел беше и нашиот Горан Пандев. Во нападот царуваше голгетерот Диего Милито, но еден разигран Холанѓанец токму позади нападот се чини ги држеше конците - Весли Снајдер.
Тогашниот претседател на Интер, легендарниот Масимо Морати, откри интересна анегдота за тоа како всушност го донел Снајдер во Интер. Ниту тоа било на барање на Жозе Мурињо, ниту пак на скаутинг тимот.
„Бев во Форте деи Марми и шанкер ме застана и ми рече: 'Претседателе, ни фали само еден играч. Што ќе прави разлика на средината. Снајдер'“, раскажува Морати во интервју за Corriere della Sera.
„Зборуваше со таков убедувачки тон, што, за да избегнам да направам грешка, му се јавив на Бранка и му реков да праша кај Мурињо. Бранка ми се прејави велејќи ми дека Мурињо само извикал 'Би сакал!'“, додаде Морати.
Марко Бранка тогаш беше дел од управата на Интер и работеше на реализација на трансфери. По негова заслуга во Интер дојдоа Лусиу, Диего Милито, Тиаго Мота и Самуел Ето.
„Почнавме преговори, кои брзо напредуваа бидејќи Снајдер не добиваше минутажа во Реал Мадрид. Никогаш повеќе не го видов тој шанкер. А, толку сакав да му се заблагодарам“, ја заврши приказната Морати.
Снајдер дојде во Интер на крајот од летото 2009 година во трансфер вреден 15 милиони евра, кој го договори Бранка. Ја доби 10-ката и веднаш на дебито блесна во 4:0 победата во дербито над Милан.
Интер таа сезона 2009/2010 ја освои Копа Италија, Скудетото, а кулминираше со Лигата на шампионите. Подоцна го освои и Суперкупот на Италија, како и Светското клупско првенство.
Снајдер замина од Интер во Галатасарај во јануари 2013 година откако одигра вкупно 116 натпревари во сите натпреварувања, постигна 22 гола и асистираше 35 пати.
