Политано се сели во Рим, додека во Милано доаѓа Спинацола. Тоа е зделката за која се договорија „Нераѕурите“ и „Џалоросите“.
Двајцата играчи веќе се наоѓаат на нивните нови дестинации каде прво ќе мора да ги поминат задолжителните медицински тестови, а потоа и ќе стават потпис на договорите.
Двајцата имаат по 26 години и се крилни фудбалери, со тоа што Спинацола освен во офанзивата игра и дефанзивно, додека Политано е стриктно офанзивен играч.
Леонардо Спинацола во Рома дојде летово и тоа за 29,5 милиони евра од редовите на Јувентус плус Лука Пелегрини, но не се снајде. Одигра само 11 натпревари во Серија А од кои 6 како стартер и само два цели 90 минути. Поголема минутажа имаше во петте натпревари во Лига Европа каде постигна и еден гол.
Матео Политано игра за Интер од летото 2018 прво како позајмен од Сасуоло за потоа да биде откупен за 26 милиони евра. Кај Лучано Спалети беше стандарден играч, но со доаѓањето на Антонио Конте во Серија А стартуваше само двапати во 11-те натпревари и никогаш не одигра 90 минути. Ист беше случајот и во Лигата на шампиони каде само 4 пати влезе од клупата, секогаш кога Интер бркаше гол.
Најверојатно двајцата најпрво ќе играат како позајмени до јуни со цел да се запази финансискиот фер-плеј, а потоа на лето ќе следува задолжителен откуп.
Во новите тимови двајцата ќе се надеваат на враќање на формата и со тоа враќање и во репрезентацијата на Италија за која Спинацола има 8 настапи, додека Политано 3 со 1 гол.
