Фудбалерите на Удинезе приредија уште едно изненадување во Калчото откако попладнево со пресврт го совладаа фаворизираниот Интер.
Откако претходно ја имаа средено Рома на Мурињо со 4:0, денеска Удинезе го победи и гигантот од Милано, со 3:1.
Натпреварот почна одлично за „Нераѕурите“ кои поведоа уште во 5. минута преку перфектно изведениот слободен удар на Николо Барела.
Се чинеше дека Интер ја има контролата, но во 22. минута Милан Шкринијар си постигна несреќен автогол и го израмни резултатот.
Во вториот дел двата тима тргнаа по трите бода, но само домаќините го најдоа патот до мрежата, и тоа во два наврата. Победникот беше одлучен во последните минути кога Удинезе постигна два гола со глава, прво преку Словенецот Јака Бијол во 84. минута по нафрлувањето на Жерард Деулофеу од корнер, а потоа и преку Турчинот Толгај Арслан од контра, исто така на асистенција на Каталонецот.
Удинезе сега има 16 бодови и изби на лидерската позиција во Серија А, но конкурентите денеска ги играат своите натпревари. Интер, пак, го запиша дури третиот овосезонски пораз и остана на 12 бода на 6. место, со можност до крајот на денов да назадува.