Техеран потврди дека ирански нафтен танкер бил нападнат во Црвеното Море од засега непознат напаѓач кој предизвикал излевање на нафта во морето.
Иранскиот Министер за надворешни работи Абас Мусави ги потврди информациите кои синоќа се раширија низ светот.
„Танкерот е погоден од два проектила за време од половина час од источната страна на Црвеното Море“, изјави Мусави не прецизирајќи за каков тип на проектили станува збор.
„Оние што стојат зад нападот се одговорни за последиците од оваа опасна авантура, вклучувајќи го и опасното загадување на природата кое ќе настане поради истекувањето“, рече тој.
Инцидентот се случил на околу стотина километри од саудискиот пристаништен град Џеда. Танкерот бил драстично оштетен во двата главни резервоари предизвикувајќи неконтролирано истекување на нафта во морето.