Највисоките ирански претставници денеска ќе се сретнат со претставници на иранските регионални сојузници од Либан, Ирак и Јемен за да разговараат за потенцијална одмазда против Израел по убиството на лидерот на Хамас во Техеран.
Ова за Ројтерс го потврдија пет извори.
Регионот се соочува со ризик од проширување на конфликтот меѓу Израел и Иран по вчерашното убиство на Исмаил Ханије во Техеран и убиството во вторникот на висок командант на Хезболах во израелски напад на периферијата на либанската престолнина Бејрут.
Иран и Хамас го обвинија Израел за атентатот. Израел, кој е во војна со Хамас во Појасот Газа, ниту го призна, ниту го негираше убиството на Ханије, која беше во Техеран на инаугурацијата на новиот претседател на Иран.
Израел има долга историја на убивање непријатели во странство, вклучително и ирански нуклеарни научници и воени команданти.
Врховниот лидер на Иран, ајатолахот Али Хамнеи, вчера му нареди на Иран директно да го нападне Израел како одмазда за убиството на лидерот на Хамас Исмаил Ханије во Техеран.
Вчера во Техеран беше поставен плакат со закана за Израел со порака на хебрејски.
„Очекувајте смртна казна“, е натписот што се гледа на плакатот, на кој во позадина има и фотографија од Исмаил Ханије и џамијата Ал Акса во Ерусалим.
