Формула 1 тимот на Ферари соопшти денеска дека ја ангажирал 16-годишната Холанѓанка Маја Вог како прв женски возач во историјата на својата академија.
Вог победи на петдневниот камп за млади таленти во седиштето на Ферари и на тест-патеките во Маранело и Фјорано и сезонава ќе настапува во првенството на Формула 4.
Директорот на Академијата на Ферари, Марко Матаса, изјави дека постигнатиот резултат на холандската тинејџерка е најдобар во историјата на кампот за млади таленти.
– Ова е клучен момент во историјата на Ферари и Академијата, изјави шефот на италијанската Ф1 екипа, Матија Биното. Тој додаде дека доаѓањето во тимот на Вог е јасен показател за настојувањето на Ферари да го направи мотоспортот поинклузивен и порамноправен.
Вог живее во Шпанија, нејзината мајка е Белгијка, а таткото Холанѓанец.
На трките во Формула 1 нема женски натпреварувач уште од 1976 година и покојната Италијанка Лејла Ломбарди.
