Италија денеска ги отвора регионалните граници по тримесечна блокада поради пандемијата на коронавирусот, со што овозможува поголема слобода на движење за повеќе од 60 милиони жители на земјата, а од денеска се дозволени и пристигнувања од Шенген-зоната без задолжителен карантин.
Регионалните граници се отворени уште од полноќ, и покрај спротивставените ставови на италијанските власти за отворањето на границите на Ломбардија, регионот што беше најтешко погоден во Италија, на што се противеа лидерите на регионите од југот, каде имаше помал број случаи на коронавирус отколку на северот од земјата.
Покрај отворањето на регионалните граници, одредени области во Италија, сепак, ги засилуваат контролите и мерките за да се спречи ширењето на вирусот преку „ следење на туристите “ со дигитални апликации, мерење на температурата со термички скенери, неопходни хотелски резервации и пополнување на прашалници по пристигнувањето.
Ломбардија, Венето и Лигурија побараа целосно враќање во нормала, Тоскана побара да почекаат уште една недела, Кампања ја критикуваше одлуката за отворање на границите, а Сардинија најави „здравствени пасоши“ за пристигнување на туристите, што министерот за регионални работи, Франсоа Боа, го смета за неуставно.
Сè уште се во сила мерките за употреба на заштитна маска и одржување растојание од два метра со цел да се спречи ширењето на COVID-19.
На железничките станици телесната температура на патниците ќе се мери со термички скенери, а доколку е над 37,5, нема да им биде дозволено да патуваат со воз.
Италија беше прва земја во Европа што воведе карантин на целата територија на почетокот на март. Повеќе од 233.000 лица во Италија се заразија со COVID-19 од почетокот на кризата, а во моментов има околу 39.000 активни случаи.