Избран најдобриот тим на ЕУРО, доминираат Шпанците

УЕФА на својата официјална веб-страница го избра најдобриот тим на неодамна завршеното Европско првенство во Германија.

Титулата за најдобра репрезентација ја освои селекцијата на Шпанија која во финалето ја совлада селекцијата на Англија со резултат 2:1.

Тоа беше четврта титула европски шампионат за Црвената фурија, што ја прави најуспешна селекција на Стариот континент.

Токму поради оваа причина најмногу Шпанци го најдоа своето место во идеалниот тим на неодамна завршеното ЕУРО.

Дури шестмина од избраниците на Луис де ла Фуенте се во идеалниот тим заедно со двајца претставници на Франција, која во полуфиналето беше поразена од Шпанија.

Покрај нив, во најдобриот тим на ЕУРО се најдоа и по еден претставник на Англија, Швајцарија и Германија.

Идеалниот ЕУРО тим на УЕФА:

Мајк Мењон (Франција); Кајл Вокер (Англија), Мануел Аканџи (Швајцарија), Вилијам Салиба (Франција), Марк Кукуреља (Шпанија); Родри (Шпанија), Фабиан Руис (Шпанија), Дани Олмо (Шпанија); Ламин Јамал (Шпанија), Џамал ​​Мусиала (Германија), Нико Вилијамс (Шпанија).

Да потсетиме, за најдобар играч на ЕУРО беше прогласен играчот за врска на Шпанија Родри, а најдобар млад играч е неговиот соиграч од репрезентацијата, Ламин Јамал.