Изуми за кои мислевме дека се дел од футуристичките замисли, стануваат реалност.
Тим инженери од Универзитетот во Сан Диего измислија нова, мека и растеглива лепенка што може да се носи, која може истовремено да го следи крвниот притисок и пулсот, како и нивото на гликоза, алкохол и кофеин во телото. Тимот тврди дека ова е прва ваква лепенка.
Лепенката беше тестирана на голем број испитаници кои извршуваа разни задачи и се покажа дека е најфункционална кога се носи на вратот. Тестирањето опфати широк спектар на задачи како што се вежбање, консумирање оброци со висок шеќер, пиење кофеински или алкохолни пијалоци и слично. Читањата беа скоро точни како оние од комерцијалните уреди со истата намена.
„Овој вид на опрема што може да се носи ќе биде од голема корист за луѓето чии здравствени услови бараат постојан мониторинг на здравствените индикатори“, вели Лу Јин, коавтор на трудот за истражувањето, објавен во списанието Nature Biomedical Engineering.
„Може да послужи и како одлична алатка за далечинско следење на пациентите, особено за време на пандемијата на COVID-19 кога луѓето ги минимизираат личните посети во болница“, вели Јин, пренесува Futurism.
На пример, лепенката може да им овозможи на дијабетичарите постојано да го следат нивото на шеќер во крвта или да детектираат сепса.
„Новина е што земаме сосема различни сензори и ги поврзуваме заедно на една мала платформа со големина на марка. Со овој уред, можеме да собереме толку многу информации на неинвазивен начин, без да предизвикаме непријатност или прекини во секојдневните активности“, вели Џозеф Ванг, професор на Универзитетот во Сан Диего и коавтор на студијата.
Лепенката е тенок лист растегливи полимери со сензор за крвен притисок и два хемиски сензори, еден за лактат (биомаркер на физички напор), кофеин и алкохол во пот и еден што ги мери нивоата на гликоза.
