Познат е и четвртиот артист кој ќе настапи на овогодинешното издание на популарниот скопски музички фестивал Здраво Млади.
Станува за збор за израелската поп-ѕвезда Нога Ерез.
„Растејќи во проблематична средина во предградијата на Тел Авив, Нога во себе долго време напластувала гнев за работите што ја опкружувале, обидувајќи се да ги канализира во танц, часови по пијано, панк-бендови, разни инди-колективи за на крај да заврши во електронската музика. За неа, компјутерот и семпловите ѝ даваат независност и бегство од суровата реалност. Одбива да зборува за конфликтот, а своите прашања и ставови ги трансформира во битови со ритмичка критика“, пишува фестивалот.
Покрај фантастичните оценки за нејзиниот нов софмор-албум „KIDS“, гостувањата на late night програмите кај Џими Кимел и Кели Кларксон, Нога Ерез веќе е најавена на најдобрите музички фестивали Coachella и Primavera кои ќе се одржат наредната 2022 година.
Секако, прво ја гледаме во Младинскиот културен центар во Скопје на 26-27 август. Досега познати се уште три учесници и тоа шведскиот панд бенд Viagra Boys, рускиот Shortparis и домашните ИСКРА.
Картите се веќе во продажба.