Барселона е еден од најдобрите тимови оваа сезона. Уште не знаат за пораз во 2025 година и се во игра за освојување на секој можен трофеј сезонава. Тимот е полн со самодоверба, особено Ламин Јамал, кој верува дека тој и неговите соиграчи и тоа како ја заслужуваат титулата во Лигата на шампионите.
Ретко може да се види вундеркинд како што е Јамал. Има само 17 години, а во колекцијата веќе има трофеј од Ла Лига, шпански Суперкуп и трофеј од Европско првенство. Што се однесува до индивидуалните награди, ги освои трофејот Копа и Златно момче, кои се доделуваат на најдобриот млад фудбалер на годината.
„Сега кога Ливерпул е елиминиран од Лигата на шампионите, мислам дека сме фаворити за освојување на ова натпреварување. Не се плашиме од ниту еден тим, ние сме семејство... Не сме исти како пред една година кога загубивме од ПСЖ“, изјави Ламин Јамал за шпански Sport.
🚨🏆 Lamine Yamal: “We are favorites to win the Champions League now that Liverpool are out of the competition”.
— Fabrizio Romano (@FabrizioRomano) March 18, 2025
“We are not afraid of any team, we are a family… and we’re not the same as one year ago against PSG”, told @Sport. pic.twitter.com/9iiMMQ6V0i
Барселона е на спротивната страна на ЛШ нокаут шемата од Реал Мадрид, со кој води голема битка за освојување на Ла Лига. Иако не е огромна, постои теоретска шанса двата лути шпански ривали да се сретнат во финалето на Лигата на шампионите, што би било прв пат во историјата на фудбалот.
Каталонците го држат водството пред „Кралскиот клуб“ оваа сезона. Беа немилосрдни на две средби годинава. И двата пати беа во улога на убедливи победници. Прво славеа со 4:0 во домашното првенство, а потоа со 5:2 во финалето на Суперкупот. Сепак, младиот шпански репрезентативец смета дека ривалството не е толку едноставно како што сугерираат резултатите.
„Ние сме тимот што му нанесува најголема штета на Реал Мадрид. Но, тоа може да се каже и за нив кога е во прашање Барселона“, заклучи Јамал.
Следното „Ел Класико“ е закажано за 11 мај во натпревар од 35-тото коло на Ла Лига, кој најверојатно ќе го реши шампионот. Дотогаш Барселона има многу напорен распоред. На почетокот на април ќе се сретне со Атлетико во реваншот од Купа дел Реј, по што ќе следи двомеч со Борусија Дортмунд во четвртфиналето на Лигата на шампионите.
