Johnnie Walker, шкотското виски старо речиси 200 години, наскоро ќе се продава во т.н. „хартиена амбалажа“, соопшти Diageo, компанијата сопственик на марката.
Новите органски пакувања ќе бидат пуштени во продажба следната пролет. За таа цел, производителот соработува со компанијата PoolPak за производство на хартиена амбалажа, која, исто така, ќе произведува амбалажи и за брендовите Unilever и Pepsi.
Изработката на стаклени шишиња троши енергија и испушта јаглерод, па затоа сега многу производители на пијалаци ја прифаќаат идејата за т.н. хартиена амбалажа. Целта е да се намали загадувањето и да се направат производите поодржливи.
Хартиените шишиња за виски ќе бидат направени од дрвен материјал и ќе можат да се рециклираат.
Coca-Cola од друга страна пак, во јануари објави дека нема да се откаже од пластичните шишиња за еднократна употреба затоа што потрошувачите сѐ уште ги сакаат.
