Драстично ослабена ќе биде „Старата дама“ на утрешната исклучително важна дерби пресметка против одличната Аталанта.
На денешната прес-конференција тренерот Андреа Пирло ја објави лошата вест за симпатизерите на актуелниот шампион. Кристијано Роналдо има мускулен проблем и ќе мора да мирува.
Сепак, Пирло најави дека повредата на Португалецот не е сериозна и поштедата од утрешниот натпревар треба да помогне тој да биде опоравен за наредниот предизвик кој е веќе в среда кога се игра вонредно коло, а Јувентус ја пречекува Парма.
Воедно, Пирло најави дека утре ќе стартува со Пауло Дибала и Алваро Мората во нападот.
Аталанта го пречекува Јувентус в недела од 15 часот на „Гевис“ стадионот во Бергамо, а правдата ќе ја дели Даниеле Орсато.
Ова е и тоа како важен дуел бидејќи е директна битка за местата кои водат во Лигата на шампионите. Моментално Јуве е трет со 62 бода, а Аталанта е веднаш зад него со бод помалку. Наполи, Лацио и Рома, екипи кои се надвор од ЛШ зоната, чекаат пораз на еден од овие два тима за да ја искористат својата шанса.