Откако оддолеа на нападите на Интер на реваншот синоќа во Торино, тимот на Јувентус се избори за своето 22 финале во историјата на италијанскиот куп.
Имајќи предност од 2:1 од првиот натпревар во Милано, Јувентус свесно му ја препушти иницијативата на Интер кој, пак, килаво напаѓаше, без завршница и за 90 минути упати само 4 удари во рамките на голот, но ниту еднаш не го стави на маки ветеранот Џиџи Буфон.
Домаќините повеќе се обидуваа преку брзи контра напади, но овој пат и нивната офанзива не беше на висина на задачата, дури ни на Роналдо не му одеше, па не успеаја да профитираат од безидејните напади на „Нераѕурите“.
Втора сезона по ред Јуве ќе игра финале откако лани на пенали загуби од Наполи. Претходно 4 пати со ред го освојуваше трофејот, од 2015 до 2018 година, а серијата ја прекина во 2019 кога не стигна до финалето.
Јувентус годинава ќе ја брка 14-тата титула во своето 22 финале, а противникот ќе го дознае вечерва кога Аталанта и бранителот Наполи ќе го одиграат својот реванш. Првиот нивен дуел во Неапол заврши 0:0.
Интер останува без финале од 2011 кога последен пат и го подигна трофејот. Има вкупно 13 финалиња и 7 победи.