Чеченскиот лидер Рамзан Кадиров ја критикуваше забраната за носење брада што им беше соопштена на руските војници, придружувајќи му се на водачот на платеничката група Вагнер, Евгениј Пригожин.
Во интервју за порталот RBC во средата, Виктор Соболев, пензиониран генерал-полковник и пратеник во рускиот парламент, ја оправда забраната за носење брада, паметни телефони и таблети како „елементарен дел од воената дисциплина“.
Кадиров, кој зборуваше за улогата на неговите трупи во војната во Украина, ги коментираше и зборовите на генералот Соболев.
„Генерал-полковник Виктор Соболев очигледно има многу слободно време, бидејќи нема што да прави освен да го препрочитува воениот кодекс на однесување“, рече Кадиров.
Кадиров ги нарече коментарот на Соболев и одлуката за забрана на брадите „јасна провокација“, велејќи дека неговите војници, кои претежно се муслимани, носат бради како дел од нивната верска должност. Шефот на Вагнер, Пригожин, чиј раскол со одбранбениот естаблишмент станува сè поочигледен, коментарите на Соболев ги нарече „апсурдни“ и „архаизми од 60-тите“.
Кадиров и Пригожин, чии сили во Украина дејствуваат главно независно од високата команда, станаа поискрени во критиките кон руското воено раководство откако војската на Москва претрпе серија порази минатата есен. Двајцата формираа премолчен сојуз, интензивирајќи ја нивната меѓусебна критика на военото раководство и повикувајќи на пожестока војна.
