Ново истражување покажува дека жените кои пијат четири или повеќе шолји кафе на ден имале во просек 4,1 отсто помалку телесни маснотии од жените кои не пијат кафе.
Група меѓународни истражувачи предводена од д-р Ли Смит од Универзитетот Англија Рускин во Кембриџ, ја испита врската меѓу употребата на кафе и телесната тежина кај жените и мажите. Научниот труд ги споредува податоците од Националниот центар за истражување на здравјето и исхраната на Центарот за контрола и спречување на болести во САД.
Резултатите покажале значителна пропорционалност меѓу пиењето повеќе кафе и намалената тежина.
– Кафето или неговите ефективни состојки би можеле да се вклопат во здравата стратегија за исхрана, за да се намали товарот на хронични заболувања поврзани со вишокот килограми, вели д-р Смит.
Конкретно, жените на возраст меѓу 20 и 44 години кои пиеле по две-три шолји кафе на ден, имале најниско забележано ниво на масно ткиво. Сепак, кај мажите овие параметри не се толку изразени. Кај мажите на возраст меѓу 20 и 44 години, кои пиеле по две или три шолји кафе на ден, масното ткиво е пониско за 1,3 отсто, а масните наслаги на стомакот се пониски за 1,8 проценти.
И Чао Као, научник од Универзитетот на Вашингтон, исто така смета дека луѓето треба да го додадат кафето во нивното мени, но покрај другата здрава храна. Секако, според него, другите фактори, како шеќерот и разните додатоци во кафето, го намалуваат тој ефект.
Значи, обидете се да пиете чисто кафе без шеќер и млеко. Сѐ е навика. На почеток промената ќе ви биде одбивна, но со тек на време ќе се навикнете. Упорноста долгорочно се исплати. Доколку ставате и шеќер и млеко, почнете постепено: прво исфрлете го шеќерот за вкусот да не ви се промени драстично, па тек потоа пробајте и без млеко.
Доколку сте вистински љубител на кафе, промената и ќе ви годи откако ќе се навикнете. Додатоците како шеќер и млеко го менуваат вкусот, а без нив ќе ја вкусите правата арома на кафето.
