Валунзите, односно жешките бранови можат да бидат непријатни за жените во менопауза. Но, постојат неколку начини да ги спречите.
Топлотните бранови најчесто се поврзани со климактериум, односно перименопауза. Овие два поими временски се поклопуваат и означуваат период во кој постепено се гаси функцијата на јајниците. Перименопаузата почнува 4 до 5 години пред менопаузата, односно околу 45 година од животот и ја означува последната менструација. За трајно престанување на менструалниот циклус може да се заклучи кога една година воопшто нема крвавење.
На жените во менопауза им се потребни повеќе хранливи состојки. Со балансирана исхрана може да се намали интензитетот на топлотните бранови и останатите симптоми на менопауза. Кога се менуваат хормоните, се менува и начинот на кој телото апсорбира хранливи материи.
Затоа, на жените им се потребни протеини, калциум и витамин Д. Потребно е да се намали внесувањето на јаглехидрати и гликоза. Исхраната треба да се состои од овошје, зеленчук, интегрални житарки и месо со малку маснотии.
Треба да се избегнува преработена храна, црвено месо, алкохол и шеќер.
Важно е и редовното вежбање затоа што помага да ја одржите агилноста, да ја зголемите енергијата, да го подобрите расположението, да ја намалите несоницата како и честите топлотни бранови.
Потребно е да спиете 8 часа дневно и да ги намалите цигарите. Медитацијата е совршен начин да го контролирате стресот и да се опуштите.
Ако чувствувате тешки симптоми на менопауза, треба да посетите доктор за да ви даде соодветна хормонска терапија. Оваа терапија најчесто доаѓа во мали дози бидејќи е поврзана со зголемен ризик од канцер и од кардиоваскуларни болести.
Нехормонска терапија подразбира антидепресиви и габапентин, лек за невролошки нарушувања кој помага во намалување на топлотните бранови кои се појавуваат навечер.
Валунзите завршуваат со потење и привремено опаѓање на телесната температура. Можат да се појават во текот на денот, но почесто навечер и додека спиете, дури до 30 пати дневно. Траат до 10 минути, а притоа може да се појави забрзано чукање на срцето и промени во дишењето. Откако брановите ќе минат, на многу жени облеката им е мокра од пот, која потоа го лади телото.