Високиот претставник на ЕУ за надворешна и безбедносна политика, Жозеп Борел, најави дека заедничкиот состанок на министрите за надворешни работи и министрите за одбрана на земјите-членки, наместо во Будимпешта, на крајот на август ќе се одржи во Брисел, поради самостојноста на Унгарија во улогата на ротирачкото претседателство.
„Треба да испратиме сигнал, макар и симболичен, дека спротивставувањето и дисквалификувањето на надворешната политика на ЕУ како страна во војната мора да има одредени последици“, рече Борел на прес-конференција по завршувањето на состанокот на министрите за надворешни работи на ЕУ.
„Затоа, мислам дека е соодветно да се свика следниот неформален состанок на министрите за надворешни работи и за одбрана во Брисел по летните одмори“, додаде Борел. Тоа е неформална средба, т.н Гимних, кој секое ротирачко претседателство го организира на своја почва.
Европската Унија бара начин да одговори на самостојното унгарско ротирачко претседателство во областа на надворешната политика. Борел претходно ја изнесе идејата дека може да свика состанок на министрите за надворешни работи на ЕУ на крајот на август во исто време кога унгарското претседателство закажува неформална средба во Будимпешта, што практично би значело бојкот на тој состанок.
Веднаш откако неговата земја го презеде ротирачкото претседателство на почетокот на месецот, унгарскиот премиер Виктор Орбан отпатува за Москва и Пекинг во самопрогласена „мировна мисија“ за да преговара за евентуален прекин на огнот во Украина. Тоа го направи без никакви консултации со други членки и институции на ЕУ, а освен тоа, ротирачкото претседателство не е овластено да ја претставува ЕУ во странство.
Орбан, исто така, претходно го напушти самитот на НАТО во Вашингтон и замина за Флорида каде што разговараше за војната на Русија против Украина со американскиот претседателски кандидат Доналд Трамп. Унгарскиот министер за надворешни работи Петер Сијарто ја критикуваше политиката на ЕУ кон Украина и во својот говор во Советот за безбедност на ОН ја обвини Унијата дека води провоена политика.
Доаѓајќи на денешната средба, Борел рече дека сака да го слушне мислењето на сите земји членки и дека после тоа ќе донесе одлука каде ќе се одржи состанокот. Полскиот министер за надворешни работи Радослав Сикорски изјави дека се разговарало за компромисен предлог Гимних да се одржи во Украина, но дека Унгарија е против тоа.
Шпанскиот министер за надворешни работи Хозе Мануел Албарес изјави дека за свикување министерски состанок надвор од ЕУ потребна е согласност од сите членки на ЕУ, па затоа идејата за состанок во Украина е отфрлена.
Хрватскиот министер за надворешни работи Гордан Грлиќ Радман на новинарско прашање дали Хрватска го поддржува бојкотот на учество на неформалните министерски средби во Унгарија, индиректно одговори дека не се согласува со тоа.
„Тој не зборуваше за бојкот. Кога зборуваме за неформален состанок на Советот, тој секогаш се свикува од висок претставник. Традицијата беше дека Гимних, неформалниот совет, се одржува во земјата што моментално претседава“, рече Грлиќ Радман.
Борел на прес-конференцијата истакна дека „таканаречената мировна мисија“ која ги игнорира основните принципи на крајот има корист само од рускиот претседател Владимир Путин.
„Политиката на ЕУ не е провоена и ние силно ги отфрламе таквите тврдења. Можам да кажам дека сите земји-членки, со еден исклучок, беа критички настроени кон однесувањето на унгарската влада“, рече Борел без да ја именува земјата, но очигледно алудирајќи на Словачка, чиј премиер Роберт Фицо дели сличен став за војната во Украина со унгарскиот премиер Виктор Орбан.
„Единствениот кој е за војна е Путин, кој повикува на поделба и предавање на Украина како предуслов за какви било преговори и прекин на огнот“, рече Борел.
