Австрискиот актер Тобиас Морети на нашите простори е познат по улогата во култната крими серија „Kommissar Rex“, во која 4 години го глумеше детективот Рихард Мозер.
Како прв сопственик на познатиот германски овчар, Морети освои најмногу симпатии кај публиката, а серијата ја напушти затоа што сакаше да работи на нови ангажмани. Ова се покажа како лоша одлука, бидејќи ниту една од неговите подоцнежни улоги не успеа да ја надмине онаа на детективот Мозер.
Морети завршил студии за композиција на Универзитетот за музика и изведувачки уметности во Виена, а земал часови по глума во школата „Ото Фалкенберг“ во Минхен. Роден е како Тобиас Блоеб, а Морети е моминското презиме на мајка му, која има италијанско потекло. Тоа презиме го користи во актерската кариера.
Од 1997 година е во среќен брак со обоистката Јулија Вилхем, со која има 3 деца. Покрај актерството и музиката, тој и неговата сопруга водат семејна фарма во Инсбрук, каде што одгледуваат стока за месо и произведуваат органски производи. На 11 јули ќе полни 65 години.
Како изгледа Тобиас Морети денес и колку се промени откако го видовме како Рихард Мозер:
Серијата „Kommissar Rex“ прв пат се емитуваше пред 30 години, а ги освои симпатиите и на возрасните и на децата поради главниот лик на кој ретко кој останува имун. Во Македонија се емитуваше на поранешната А1 како „Комесарот Рекс“ на германски јазик со превод на македонски.
