Малиот градски електричен автомобил Dartz FreZe Nikrob ќе чини од 9.999 евра.
Електричните возила сè уште се значително поскапи од моделите со конвенционални мотори, но во класата мали градски автомобили може да се најде по некој пристапен модел.
Ваквите возила не се невообичаени во Кина, а неодамна пристигнаа и на европскиот пазар.
Меѓу нив е и Dartz FreZe Nikrob, за кого се вели дека ќе биде еден од најевтините електрични автомобили во Европа кога ќе пристигне во продажните салони.
Производителот тврди дека овој мал модел може да превезува четворица патници, а автономијата во возењето со полна батерија е до 200 километри. Другите технички детали сè уште не се објавени.
Цената на автомобилот на европскиот пазар ќе започне од 9.999 евра, што е, да речеме, двојно помалку од цената на електричниот Smart EQ ForTwo.
На фотографиите се гледа автомобилот во пред-производство, делумно „камуфлиран“ со фолија, а на клиентите ќе им бидат понудени неколку опции, вклучително и една без задни седишта, но со поголем багажник.
FreZe Nikrob е базиран на моделот Wuling Mini-EV, кој се продава во Кина за околу 3.750 евра, но има различен дизајн од кинеската верзија.
Сепак, она што е поважно за европските клиенти од дизајнот е безбедноста.
Производителот наведува дека во споредба со кинескиот модел, FreZe Nikrob ќе има воздушни перничиња и електронски систем за контрола на стабилноста, со цел да ги исполни европските регулативи и стандарди.
Затоа цената ќе биде значително повисока од онаа што ја има Wuling Mini-EV во Кина.
FreZe Nikrob ќе претрпи уште неколку модификации, вклучувајќи инсталирање на поекономични LED светла, а Carbuzz пишува дека Dartz сака да го понуди овој модел најпрво на клиенти во Германија, Норвешка и Франција, каде што е голема побарувачката за електрични автомобили.