Тим меѓународни научници ја симулираа глобалната поплава предизвикана од удар на астероид пред 66 милиони години.
Научниците користеле специјален софтвер за да го рекреираат огромното цунами за кое се верува дека ги „избришало диносаурусите од лицето на Земјата“ пред десетици милиони години. Поплавата предизвикана од ударот на астероидот предизвикала бранови високи неколку километри, кои ја преплавиле целата планета.
Американската Национална администрација за океани и атмосфера (NOAA) објави видео од компјутерската симулација.
Разорниот природен настан, кој бил 30.000 пати помоќен од кое било регистрирано цунами, било предизвикано од ударот на огромен астероид на местото каде денес се наоѓа полуостровот Јукатан во Мексико. Небесното тело имало дијаметар поголем од 10 километри.
Астероидот оставил длабок кратер познат денес како кратер Чиксулуб, а ударот предизвикал бранови високи до 4,5 километри.
Ударот на астероидот се совпаѓа со настанот на истребување во кој исчезнале 75 проценти од целата флора и фауна на Земјата, вклучувајќи ги и диносаурусите без крилја.
Компјутерската симулација е резултат на заедничката работа на истражувачи од повеќе земји. Научниците комбинираа нумеричко моделирање и анализа на геолошки записи за да создадат она што тие го опишуваат како „прва глобална симулација на цунамито по ударот на астероидот“.
Моќната компјутерска програма која ги моделира деталите за сложените текови на течностите, наречена hydrocode, ги рекреираше првите 10 минути од генерирањето на цунамито, додека два модели на NOAA ги симулираа шемите во кои брановите се ширеле низ планетата. Научниците ги анализирале и геолошките податоци од повеќе од 100 локации низ светот за да ги потврдат своите проценки.
Ова истражување би можело да помогне да се „процени и квантифицира ризикот од идни големи удари на астероиди“. Дополнително, моделот би можел да помогне да се предвиди влијанието на цунами настани од помал обем, кои редовно се случуваат денес.
