Постојаната привлечност на SUV возилата за купувачите на нови автомобили во Европа помогна да се зголеми побарувачката во инаку стагнантната година за продажба. На листата од 50 најпродавани модели, половината беа SUV возила од различни сегменти.
SUV возилата постигнаа рекорден удел на пазарот минатата година, со речиси 54 проценти од вкупните регистрации. Можеби ова не е случајно, бидејќи некогаш омилените хечбек модели го загубија лавовскиот дел од пазарот.
И покрај забавувањето на растот на оваа категорија во последните три години, теренците останаа најпродаваниот сегмент на возила во Европа. Потрошувачите во Европа минатата година купиле 6,92 милиони SUV возила, четири отсто повеќе од 2023 година.
Компактните теренци (C-SUV сегментот) беа најпопуларниот тип во категоријата, а Kia Sportage беше најпродаван. Овој сегмент сочинуваше 42 отсто од вкупните регистрации на теренци минатата година. Втори по популарност беа помалите модели (B-SUV), со пазарен удел од 36 отсто, а најголем број продадени единици забележа VW T-Roc. Сепак, најголем раст постигнаа луксузните теренци, чии регистрации се зголемија за 13 отсто, на 56.300 примероци.
Речиси една четвртина од вкупниот број на нови теренци регистрирани во Европа минатата година беа од групацијата Volkswagen, а T-Roc и Tiguan се меѓу првите десет најпродавани модели во категоријата. Stellantis беше втор најпродаван со речиси 800.000 примероци - седум проценти помалку од 2023 година - додека дуото Hyundai-Kia беше на третото место со повеќе од 705.000 примероци, што е пад од еден процент.
Теренците беа клучен сегмент за голем број производители на автомобили минатата година, вклучувајќи ги Jaguar Land Rover, Geely, Honda и SAIC Motor, додека сегментот сочинуваше помалку од половина од вкупната продажба на Stellantis, Renault Group, BMW Group, Mercedes-Benz и Mitsubishi.
