Само 48 часа откако беше објавена европската Супер лига како иднината на фудбалот, идејата доживеа крах откако половина од тимовите кои ја основаа се повлекоа.
Челси, Манчестер Сити, Манчестер Јунајтед, Ливерпул, Aрсенал и Тотенхем, односно сите англиски клубови кои беа во Супер лигата и имаа волја да се одвојат од УЕФА, синоќа се премислија и донесоа одлука да се откажат од Супер лигата, а и Интер е под знак прашање.
Ова значи дека Супер лигата доживеа крах и дека невозможно е да продолжат само Реал Мадрид, Барселона, Атлетико, Јувентус и Милан.
Клубовите од Супер лигата (односно нивните сопственици) беа многу самоуверени, но не очекуваа толку силна реакција од УЕФА, а потоа и од Европската Унија, политичари, фудбалски федерации, фудбалски лиги, други клубови, играчи од други клубови…
Сепак, можеби најголемо влијание имаа реакциите од играчите и тренерите од некои од клубовите од Супер Лигата, како на пример Милнер, Гвардиола, Хендерсон…
На ова се надоврзаа и реакциите на навивачите кои на сопствениците јасно им ставија до знаење дека не можат да инсистираат на натпреварување за кое се само тие. Пред стадионот на Челси настана и општ хаос.
Да, можно е клубовите да се откажаа поради реакциите на навивачите, но постојат и поверојатни сценарија за други причини кои доведоа до тоа.
УЕФА почна да преговара со англиски инвестициски фондови кои би вложиле големи средства во буџетот на новата Лига на шампиони (наводно околу 4,5 милијарди евра), што би значело дека клубовите во иднина би заработувале значително повеќе отколку сега.
Чеферин беше мудар и најде начин како да ги подели сложните 12 клубови.
Каталонскиот Mundo Deportivo пренесува дека УЕФА ја добила битката така што само на англиските клубови им понудила сериозна сума на пари за да ја напуштат Супер Лигата, а тие поради понудата која не можеле да ја одбијат, заедно со другите притисоци, одлучиле да прифатат да се откажат од Супер Лигата.
Интересно е што УЕФА не ги контактирала ниту шпанските, ниту италијанските клубови, кои ги гледа како одговорни за формирање на ова натпреварување.
Флорентино Перес и Андреа Ањели, првите луѓе на Реал Мадрид и Јувентус, станаа непожелни во европскиот фудбал откако УЕФА успеа да ги победи за 48 часа.
