Голманот на Ливерпул, кој во средата му одбрани пенал на Кулјан Мбапе, има име што цел всет, освен Ирците, мака мачи да му го изговори.
Многу поедноставно е да се вика по презимето Келехер, што е и вообичаена пракса кај сите фудбалери. Но, некогаш потребно е да се употреби и целосното име и презиме, а тука сите заглавуваат, од новинари и коментатори до обични симпатизери и фудбалски вљубеници.
Ниту на прв обид никој не може да најде начин како да го изговори ирското име Caoimhín, а камо ли пак да го напише на кирилица. Името е толку чудно, со три самогласки една до друга, па разни опции ни минуваат низ глава и ниту една не делува правилна.
Caoimhín е всушност ирската верзија на името Kevin (Кевин) и значи „личност со благороден и љубезен карактер“. Не делува така, но навистина е така. И тука сепак има скриена квака. Не цела Ирска го изговара ова име на ист начин. Многу е важно од кој дел на земјата е личноста чие име е Caoimhín, затоа што човек од главниот град Даблин и човек од Килкени носат исто име кое различно се изговара.
Келехер е од градот Корк, каде се зборува манстерскиот дијалект на ирскиот јазик. На манстерски ирски името Caoimhín се изговара Куивин. Толку едноставно. Во Даблин, на пример, е Куивен.
Таков е ирскиот јазик, ќе изнапишат букви, а на крај изговараат некои што ги нема. Бетер од англиски.
Среќа презимето Келехер е англизирана верзија на ирското презиме Ó Céileachair. Значи, Куивин Келехер всушност можел да биде Caoimhín Ó Céileachair...
26-годишниот Келехер е во Ливерпул уште од својата 17-годипшна возраст, а досега има 21 настап бидејќи всушност е втор голман. Моментално ја користи повредата на Алисон Бекер. Единица е на Ирска за која има собрано 20 настапи.
