Мадрид, 22 ноември 2019 (МИА) – Канада обезбеди пласман во полуфиналето во новиот формат на Дејвис Купот откако Вашек Поспишил и Денис Шаповалов го добија решавачкиот натпревар во двојки против Австралија.
Бр. 150 на светска ранг листа, кој игра исклучително инспирирано од почетокот на неделата во Мадрид, им даде предност на „Jаворовите листови“, откако во воведниот натпревар го совлада Џон Милман со 7-6 (7), 6-4.
Шаповалов, кој досега имаше и два успешни синглови, беше близу до третата победа против Алекс Де Минор, но на крај беше поразен со 6-3, 3-6, 5-7. Шампионот од Стокхолм, сепак, се опорави малку подоцна и заедно со Поспишил го совладаа тандемот Џордан Томпсон и Џон Пирс со 6-4, 6-4.
Така, Канада се квалификува во полуфиналето, каде нејзин ривал ќе биде победникот меѓу Србија и Русија, дуел кој се игра во сабота. Канада ја совлада Австралија за првпат во историјата и тоа за пласман во полуфиналето на Дејвис купот.
Во другите две четвртфиналиња, во попладнево ќе се соочаат Обединетото Кралство - Германија и домаќинот Шпанија против Аргентина.
