Главниот мотиватор во кралскиот клуб отпадна за реваншот против „Црвените“ во Лигата на шампионите откако излезе позитивен на тестирањето за COVID-19.
Реал Мадрид утре вечер против Ливерпул го игра реванш натпреварот од четвртфиналето, но ќе мора да издржи пеколни 90 минути без својот капитен Серхио Рамос. Тој доби позитивен тест за коронавирусот и денеска не отпатува со тимот за Островот. Ова го потврди самиот клуб.
„Реал Мадрид соопштува дрека нашиот играч Серхио Рамос излезе позотивен на COVID-19 на последното тестирање кое беше направено“, кратко објави кралскиот клуб.
Поради повреда Рамос не играше ниту на првиот натпревар кој тимот на Зинедин Зидан сепак успеа да го добие со 3:1, но голот примен дома е искрата на надеж која ја гледа Јирген Клоп бидејќи победа од 2:0 утре би била сосема доволна за Ливерпул да се најде во полуфиналето.
Она што сега следува за 35-годишниот дефанзивец е 10-дневна изолација согласно ковид-протоколите. Тој ќе може да се врати на тренинзите откако ќе добие негативен тест. Со оглед на тоа, ќе ги пропушти и наредните два натпревара од Ла Лига против Хетафе и Кадис.
Реал утре ќе биде и без повредените Еден Азар и Лукас, како и Рафаел Варан кој е исто така позитивен.
Натпреварот почнува во 21 часот, а ќе го суди холандскиот арбитар Бјерн Кујперс.
