Данскиот фудбалер Кристијан Ериксен доживеа срцев удар среде натпреварот на Европското првенство меѓу Данска и Финска. Еден од најпознатите спортски кардиолози во Англија, Санџај Шарма, вели дека е знак на прашање дали 29-годишниот фудбалер ќе продолжи со фудбалот.
Познатиот кардиолог тврди дека ова најверојатно му е последниот натпревар во кариерата. Срцето на фудбалерот престана да чука пет минути и поради ризик од ново нарушување на здравјето, тешко дека ќе игра понатаму.
„Веројатно е тоа крај на неговата кариера“, порача и доктор Скот Мареј, главен консултант за кардиологија во Националната здравствена служба на Обединетото Кралство.
Постои и добар аргумент за тоа.
„Италијанците им забрануваат на луѓето со срцеви абнормалности да се занимаваат со спорт, таков е законот“, изјави Мареј за фудбалерот кој настапува за Интер.
„Така работат веќе 20 години и со тоа степенот на смртност од срцев удар во спортот е намален од три на помалку од еден процент. Веројатно Ериксен ќе мора да има посебен пејсмејкер, уред кој ја следи работата на срцето и предупредува на проблеми“, објасни тој.
Ериксен има само 29 години и никогаш претходно немал срцеви проблеми, ниту претходните тестирања покажале неправилности.
И доктор Шарма го дели истото мислење, во Англија не би можел да игра бидејќи законите се строги.