Легендарниот шпански голман објави дека официјално се пензионира од активно играње фудбал.
Уште една легенда го напушта фудбалот. Голманот Икер Касиљас попладнево на Twitter објави дека ги закачува копачките и се простува со местото помеѓу стативите.
„Важен е патот кој го одиш и луѓето кои те придружуваат, не судбината до која ќе те однесе, бидејќи таа со работа и труд, доаѓа сама и верувам дека можам да кажам, без сомнеж, дека ме одведе по патот и до судбината кои ги сонував #Grac1as“, твитна Икер.
Дете на Реал Мадрид, Касиљас скоро целата кариера ја мина во својот матичен клуб за кој одигра 725 натпревари во сите натпреварувања, а помина 16 сезони во кои освои 5 титули во Ла Лига, 2 во Копа дел Реј, 4 шпански Суперкупа, 3 Лига на шампиони, 2 УЕФА Суперкупа, 2 Интерконтинентални купа и 1 Светско клупско првенство.
Летото 2015 година го напушти Реал и замина во португалскиот гигант Порто каде мина 5 сезони. Одвои 2 титули шампион на Португалија и по 1 Куп и Суперкуп.
На 1 мај 2019 година за време на тренинг Касиљас доби мал инфаркт по што повеќе не заигра. Се лечеше, а иако беше во составот на Порто, го одложуваше враќањето не сакајќи да ризикува. Денес одлучи дека на 39 години е време да замине во заслужена пензија.
Касиљас долги години беше и број 1 во шпанската репрезентација. Дебитираше во 2000 година наследувајќи го Сантјаго Кањизарес, а потоа се афирмираше како незаменлив во „Фуријата“. Освои две титули европски шампион (2008 и 2012) и една мундијалска, онаа во 2010.
