Kawasaki официјално претстави мотоцикл кој работи на водород и ги ветува сите предности на традиционалниот мотоцикл со многу помали издувни гасови.
Мотоциклот е заснован на моделот Ninja H2 и го придвижува 1,0-литарски (998 кубика) мотор со компресор, кој е изменет да користи водород наместо бензин. Водородот се вбризгува директно во цилиндрите додека мотоциклот работи на традиционалниот процес на согорување.
Сепак, моторот не е единствената промена, бидејќи мотоциклот доби и канистри со водород, како и систем за снабдување со водород. Овие компоненти се наоѓаат на задната страна и се дизајнирани да изгледаат како бисаѓи.
Kawasaki неодамна го демонстрираше мотоциклот на патеката „Сузука“ за време на трката за издржливост Suzuka 8 Hours Endurance Race. Тоа беше кулминација на неколкумесечната работа на проектот, кој започна во март 2023 година, а тест возењата беа спроведени на почетокот на годинава.
Компанијата соопшти дека мотоциклот обезбедува „чуство на татнеж и пулсирање што возачите го сакаат кога го вртат гасот, додека испушта главно вода и многу мала количина на CO₂“. Дополнително, мотоциклот би можел да ги избегне проблемите со ограничениот домет и долгите времиња на полнење, кои се пречка за електричните мотоцикли.
Иако е прототип, Kawasaki планира да започне со производство на водороден мотоцикл на почетокот на 2030-тите. Сепак, компанијата предупреди дека временските рокови и достапноста може да се разликуваат во зависност од инфраструктурата за снабдување со водородно гориво и правниот статус во секоја земја.
