Локалните власти од Пефкохори, на четири јазици, грчки, англиски, српски и македонски, преку социјалните мрежи ги информираат туристите дека е забрането оставање лични предмети на плажата со цел да се зачува местото, а во спротивно предвидени се казни, јави дописничката на МИА од Атина.
Локалниот совет на заедницата Пефкохори, преку објавениот пост на Facebook потсетува дека сите оставени предмети ќе бидат одземени, а на туристите ќе им бидат вратени откако ќе ја платат казната.
-Забрането е да зафатите место на плажата со вашите предмети преку ноќ, рано наутро и во текот на ручекот. Во спротивно доколку има напуштени предмети на плажата ќе бидат одземени од комунални редари и ќе бидат вратени по плаќањето на казната, пишува на македонски јазик локалниот совет на заедницата Пефкохори.
На популарната туристичка дестинација на првиот крак на Халкидики, според локалните медиуми, во изминатите години создавала проблеми праксата на туристите да оставаат чадори, пешкири, душеци и други лични предмети со цел да имаат обезбеден простор на плажата.