Вчера бевме сведоци на едно од најнеобичните милански дербија, на соочувањето меѓу Интер и Милан во четвртфиналето од Копа Италија.
Интер победи со 2:1, нокаутирајќи го Милан во седмата минута од судиското надополнување, а натпреварот исполнет со инциденти го обележа токму соочувањето меѓу најдобрите стрелци на градските ривали на крајот на првото полувреме.
Алесио Ромањоли го фаулираше Лукаку пред казнениот простор на Милан, по што започна жестока кавга помеѓу Златан Ибрахимовиќ и Ромелу Лукаку. Белгиецот дофрли нешто кон Швеѓанецот, кој потоа со глава го удри Лукаку во брадата.
Судијата Паоло Валери им даде жолти картони на двајцата, но тоа не ги смири.
Благодарение на фактот што натпреварите се играат без публика, сè се слуша од теренот и со оглед на тоа дека вербалната пресметка продолжи на англиски јазик, целиот свет не само што можеше да го слушне, туку и да го разбере дуелот на навреди што следеше после тоа.
Лукаку: "Ајде, ајде да одиме надвор!"
Златан: „Јави ѝ се на мајка ти и правете ги оние ваши вуду сра*а, магаре едно!“
Лукаку: "Ќе те е*ам и тебе и жена ти. Сакаш и за мајка ти малку, оти е к*рва!“
После тоа, се упатија кон тунелот. На пат таму, неговите соиграчи едвај го задржаа Лукаку да трча по Ибрахимовиќ, кој брзо се пикна во соблекувалната.
И во продолжението, голгетерите на миланските великани беа во главните улоги. Прво, Златан беше исклучен по вториот жолт картон кој го доби затоа што го покоси Александар Коларов, а потоа Лукаку од пенал го изедначи резултатот што го постави Ибра во првото полувреме. Победата за Интер ја донесе Кристијан Ериксен од слободен удар во судиското надополнување.
Интер така обезбеди полуфинале против победникот од мечот Јувентус - СПАЛ, но ќе бара место во финалето без најдобриот стрелец бидејќи Лукаку го елиминира жолтиот картон од тој натпревар, што го доби во пресметката со Ибра.