Хабиб Нурмагомедов, УФЦ шампионот во лесна категорија, на 25 октомври треба да го одбрани појасот против привремениот првак Џастин Гејџи.
Хабиб се повлече од јавноста и беше во жалост по смртта на татко му пред еден месец, но сега полека се враќа во центарот на вниманието.
Познатиот подкастер и ММА фанатик Џо Роген објави видеоснимка од спаринг тренинг на Гејџи, а Хабиб не издржа да не напише коментар.
„Џастин е добар дечко и добар противник за мене, но кога ќе се затворат вратите на октагонот мора да биде подготвен не само на боксерски меч, оти јас не сум ни Дастин (Поарје), ни Тони (Фергусон). Ќе го однесам во длабокото и ќе го удавам. Со господ напред“, напиша Хабиб.
Дагестанецот последен пат се бореше лани во септември во Абу Даби, каде во третата рунда во борбата за шампионското место го задуши Дастин Поарје.