Возачот на Мерцедес, Луис Хамилтон, раскажа колку е тешко да се освои трката за Големата награда на Тоскана.
„Сето тоа е малку поразително, како три трки во еден ден. Беше неверојатно тешко, стартот беше тежок“, почна Хамилтон.
„Патеката е феноменална. Поради жештината и фактот што морав да го задржам Валтери Ботас, кој покажа брзина цел викенд, не беше лесно, а на почетокот на трката заостанував. Беше многу, многу тешко да се остане фокусиран со сите овие рестартирања“, рече тој.
Британецот синоќа на патеката „Муџело“ ја забележа шестата победа сезонава со што е убедлив лидер на табелата со 190 бодови, дури 55 пред второпласираниот Ботас.
Хамилтон сега се наоѓа на една победа до рекордот на легендарниот Михаел Шумахер. Британецот викендов ја оствари 90-тата победа, а Германецот има 91.