Хаос во Куба: По неколку прекини на струја почнаа протести, сега и апсења

Кубанската влада во саботата соопшти дека уапсила неколку луѓе кои организирале протести откако ураганот го остави островот без струја по втор пат во последните неколку недели.

Обвинителството соопшти дека лицата уапсени во Хавана и централните провинции се обвинети за напад, јавен неред и материјална штета.

Ураганот Рафаел ја исфрли струјата во средата откако го погоди западниот дел на карипскиот остров со 10 милиони луѓе како голема бура од трета категорија.

Пред само две недели ураганот Оскар усмрти осум лица на истокот на островот при прекин на електричната енергија во земјата поради дефект на најголемата електрана на островот и недостиг на гориво.

Владата соопшти дека половина од граѓаните на Хавана сега повторно имаат струја, но повеќето од главниот град и соседните провинции немаат.

Според обвинителството, приведените по протестот се товарат за „дела на агресија врз властите и територијалните инспектори, нанесување повреди и вознемирување на јавноста“.

Групата за човекови права Justicia 11J соопшти дека повеќе од 10 лица се уапсени во Гуанабакоа, град во предградието на Хавана.

 „Прогонот на луѓето во главниот град продолжува“, напишаа тие на социјалната мрежа Х, додавајќи дека уапсените мирно учествувале во протестот, што самата група го документирала.

Невладината организација Кубалекс со седиште во Мајами во петокот објави дека осум лица се уапсени во Енкрусијада, централна Куба.

Куба со месеци страда од повеќечасовни прекини на електрична енергија и се наоѓа во средината на својата најтешка економска криза од распадот на клучниот сојузник Советскиот Сојуз во раните 90-ти - обележана со зголемената инфлација и недостиг на основни производи.

Електричната енергија на островот се произведува од осум застарени електрани на јаглен, од кои некои се расипаа, како и седум пловечки електрани изнајмени од турски компании и голем број дизел генератори.

Со зголемената загриженост за нестабилноста, претседателот Мигел Дијаз-Канел предупреди дека неговата влада нема да толерира обиди за „нарушување на јавниот ред“.

Пред три години, на 11 јули 2021 година, илјадници Кубанци излегоа на улиците низ островот извикувајќи „Гладни сме“ и „Слобода!“, во редок повик до комунистичките власти.

Според „Justice 11J“ со седиште во Мексико, повеќе од 1.500 луѓе се уапсени од тие протести, а 600 се уште се во затвор.

Некои добија затворски казни до 25 години.

Во последните три години имаше и други спорадични протести, а тие избувнаа поради прекини на струја и други проблеми.

Минатата недела, Генералното собрание на ОН го обнови својот долгогодишен повик до Соединетите држави да го укинат трговското ембарго наметнато на комунистичкиот остров на почетокот на 60-тите.