Поранешниот германски репрезентативец Томас Хицлшпергер се огласи на Twitter откако УЕФА забрани стадионот во Минхен да биде осветлен во боите на виножитото.
Алијанц Арената, која го смени името во Фудбал Арена Минхен за време на ЕУРО, требаше да блесне во виножито како реакција на изгласувањето на законот во унгарскиот Парламент за забрана за „промовирање хомосексуалност“ кај малолетници. Ова предизвика реакции кај активистите за човекови права бидејќи претставува уште едно во низата ограничувања на конзервативната влада на премиерот Виктор Орбан за ЛГБТ лицата.
По пензионирањето во 2013 година, Хицлшпергер отворено се изјасни дека е геј и стана првиот професионален фудбалер што го сторил тоа.
„Почитувани ЕУРО 2020, не се навредувајте од боите на виножитото. Помислете на оние кои сè уште се дискриминирани. Им треба поддршка. И вашата поддршка!" напиша тој.
Хицлшпергер беше играч на Астон Вила и Штутгарт.
