Трибините на стадионите ширум светот по рестартирањето на спортот останаа празни, па некои клубови се обидуваат да ги пополнат на креативни начини, а еден од најпопуларните е ставање на седиштата картонски исечоци со фотографии на навивачите во природна големина.
Ваквата тактика им се удри од глава на организаторите на рагби натпревари во Австралија, каде на еден натпревар еден од „гледачите“ беше Харолд Шипман, злогласениот британски сериски убиец кој во 2000 година беше прогласен за виновен за убиство на 15 пациенти со смртоносна инјекција.
Австралиската рагби лига (NRL) ја почна иницијативата The Fan in the Stand (Навивачот на трибините) преку која за 22 долари може да се приложи своја фотографија што ќе биде поставена на трибините.
Очигледно, некои луѓе ја злоупотребија приликата и ја покажаа духовитоста во најлошо светло, испраќајќи фотографија на Шипман која се појави на трибините во Кембелтаун, на вчерашниот натпревар меѓу Пантерс и Најтс.
Шипман не е толку познат во Австралија и остатокот од светот колку во Велика Британија, но NRL сепак најави дека во иднина повеќе ќе се внимава.
Можеби инцидентот ќе поминеше без поголема помпа да не реагираше Мети Џонс, поранешен рагбист и сега ТВ-коментатор и водител, кој во својата емисија направи уште поневкусна шега.
Тој го намонтира Адолф Хитлер на трибините, што предизвика бесни реакции и критики од еврејската заедница во Австралија.
Џонс и телевизиската куќа за која работи се извинија.
„Сегментот од мојата емисија Fox League во кој прикажавме фотографија на Хитлер меѓу картонската публика беше невкусен потег и потполно несоодветен. Знам дека Fox Sports веќе се извини, но јас сакам лично да се приклучам во извинувањето. Знам колку се тие настани и ден денес разорни за многу луѓе и семејства. Погрешив и сакам да им се извинам на гледачите и на сите во заедицата кои беа навредени од сегментот“, соопшти Џонс и додаде дека веќе посебно се извинил на целата еврејска заедница.