Националната хокеј лига (НХЛ) строго го казни играчот на Сан Хозе Шаркс, Евандер Кејн, откако беше фатен со фалсификуван сертификат за вакцинација против COVID-19.
НХЛ му изрече суспензија од дури 21 натпревар на популарниот хокеар, време за кое нема да прима плата од својот клуб.
Според американските медиуми, Кејн ја фалсификувал потврдата за вакцинација. Веста ја потврди и неговиот клуб, а овој непромислен потег на крилниот напаѓач ќе го чини и 1,68 милиони долари, кои ќе му бидат одземени од 7-милионската плата.
„Иако сме задоволни од посветеноста на Кејн, разочарани сме од непочитувањето на безбедносните протоколи утврдени од НХЛ и НХЛПА“, се вели во соопштението на Сан Хозе Шаркс.
Се огласи и самиот хокеар кој им вети на навивачите дека во иднина ќе носи подобри одлуки.
„Сакам да им се извинам на моите соиграчи, клубот Сан Хозе и сите навивачи откако го прекршив ковид-протоколот. Направив грешка и се каам, подготвен сум да ја преземам одговорноста за тоа“, рече Кејн.
Левото крило на „Ајкулите“ вети дека за време на забраната за играње на мразот, ќе работи на себе со цел да носи правилни одлуки во иднина.
Кејн, родум од Ванкувер, е поранешен репрезентативец на Канада, а досега во најквалитетната хокеј лига на светот освен за Сан Хозе настапуваше и за Бафало Сејбрс, Винипег Џетс и Атланта Трешерс, како и за Динамо од Минс во руската КХЛ и за Ванкувер Џајантс во ВХЛ.
Ноќеска неговиот тим победи со 5:0 на гостувањето кај Монтреал Канејдиенс, а Кејн не беше во составот како во првиот натпревар од новата сезона кој неговиот тим исто така гп доби, но дома со 4:3 над Џинипег.
