Се чинеше дека ова ќе биде тешка сезона за Барселона, но Чави успеа од нив да го направи најамбициозниот проект во Европа.
Барселона летово мораше да го притисне копчето „рестарт“ за да преживее, а по првичната агонија поради заминувањето на Лео Меси, навивачите повторно се смеат. Посебно по перфектната игра на нивниот тим на Ел Класико, која вели дека на тимот на Чави му претстои светла иднина.
Зимава имаше засилувања и сега е време клубот дополнително да се засили на лето, па по потписот на Франк Кесие пристигнува нова бомба - Барселона сака да го врати Лео Меси и покрај него да го ангажира и Ерлинг Холанд!
Така Енрико Масип, советник на претседателот на клубот Жоан Лапорта, ја „запали“ јавноста во Шпанија со порака дека и двајцата се мета на Барселона и дека можно е на „Камп Ноу“ да го видиме најмоќниот напад на денешницата.
„Холанд и Меси во Барселона? Немојте да се чудите ако тоа се случи летово“, изјави Масип за Marca.
Меси наводно му рекол на Пари Сен-Жермен дека сака да замине на лето, бидејќи не е среќен во новиот клуб, но неговата огромна плата, дури и обештетувањето, може да биде непремостлива пречка. Особено во случајот со Барселона, која се бори со финансискиот фер-плеј.
Што се однесува до Холанд, за него ќе биде голема битка, бидејќи покрај Барселона демнат Реал Мадрид и Манчестер Сити, а на крајот парите би можело да бидат пресудни.
