Холандија вчера привремено ја прекина вакцинацијата со AstraZeneca за лица помлади од 60 години, по смртта на жена која примила ваква вакцина, соопшти холандското Министерство за здравство.
Околу 10.000 датуми за вакцинација се откажани по одлуката за прекинување на употребата на вакцината AstraZeneca за таа возрасна група, објави новинската агенција ANP.
Одлуката е донесена врз основа на нови извештаи од агенцијата за следење на лекови Lareb и разговори со здравствените власти, се вели во соопштението на Министерството за здравство.
Холандската агенција Lareb, која ги следи несаканите ефекти на лековите, претходно вчера соопшти дека добила пет извештаи за случаи на згрутчување на крвта поврзани со тромбоцитопенија откако биле вакцинирани со AstraZeneca, вклучувајќи ја дијагнозата на починатата жена.
Lareb тврди дека здравствените проблеми се случиле седум до 10 дена по приемот на вакцината и дека станува збор за жени на возраст од 25 до 65 години.
Lare вели дека извештаите за случаи во Холандија се слични на оние во остатокот од Европа.
Привремениот прекин на вакцинацијата на возраст под 60 години со вакцината AstraZeneca ќе трае до 7 април, односно до датумот кога Европската агенција за лекови (ЕМА) треба повторно да даде насоки.
Одлуката за прекинување на вакцинацијата беше донесена откако Германија го стори истото претходно оваа недела.
Вкупно 1,2 милиони случаи на коронавирус и повеќе од 16.500 смртни случаи се пријавени во Холандија.
