Актерот Брус Вилис бил исфрлен од аптека вчера, откако одбил да носи маска во објектот.
Според странските медиуми, луѓето во аптеката биле вознемирени затоа што Вилис (65) не носел маска. Актерот имал шал ставен околу вратот.
Ѕвездата на филмот „Die Hard“ (Умри машки), кој беше фотографиран во аптеката без маска, го напуштил објектот со празни раце откако менаџерите му рекле дека не може да биде услужен ако не носи маска.
Вилис подоцна преку неговиот ПР агент се извини за инцидентот, велејќи дека било „погрешна одлука“ да не стави маска и порача:
„Бидете безбедни и да продолжиме да носиме маски“.
Округот Лос Анџелес, епицентарот на КОРОНА кризата во Калифорнија, надмина 10.000 смртни случаи од COVID-19.
Јавноста изрази загриженост дека со ваквиот потег, Вилис се покажал како антимаскер – човек кој одбива да носи заштитна маска за време на пандемија - додека поголемиот дел од Холивуд активно лобира за следење на мерките и препораките за заштита од коронавирусот. Некои дури и го нарекоа „ковидиот“ - човек кој одбива да верува во коронавирусот и да се заштити од зараза.
Актерот поголемиот дел од КОРОНА-кризата го помина во карантин со неговата поранешна сопруга Деми Мур и нивните возрасни деца во семејната куќа во Ајдахо.
