Американскиот актер Стивен Сигал, кој има руско и српско државјанство, се зачлени во партија блиска до рускиот претседател Владимир Путин, пренесе Guardian.
Партијата Праведна Русија – Патриоти – За вистината, којашто ги поддржува скоро сите иницијативи на Кремљ и Путин, но е ривал на владејачката Единствена Русија, објави дека актерот стана нејзин член.
69-годишниот Сигал вчера се сликаше со еден од лидерите на партијата, рускиот писател Захар Прилепин, поврзан со проруските сепаратисти на истокот на Украина кои ја поддржуваат Москва.
Сигал доби руско државјанство во 2016 година, а го задржа и американското. Важи за пријател на Путин и е еден од малкуте западни актери и спортисти кои за време на неговиот мандат добија руско државјанство.
Министерството за надворешни работи на Русија го постави за специјален пратеник за културни врски со САД во 2018 година.
Српско државјанство доби во јануари, 2016 година кога изрази желба да отвори школа за аикидо во Србија. Најавено е дека ќе држи обука за боречки вештини на српските специјалци.
