Темелите на масивниот хотел Ryugyong во Пјонгјанг се поставени уште во 1987 година, но оваа градба до денес е сè уште напуштена.
Облакодерот во форма на пирамида е висок 330 метри, а до 2017 година беше и највисока градба на Корејскиот Полуостров. Потоа беше надминат од облакодерот Lotte во Сеул, Јужна Кореја. Засега му останува титулата на највисока напуштена зграда во светот.
Осмислен е како хотел со над 3.000 соби и пет ротирачки ресторани на врвот, од каде има неверојатен поглед на целиот град.
Градењето на објектот е запрено во 2008 година, со што со години празниот хотел се надвиснува над помалите објекти околу себе. Градежните работи потоа продолжија со кратки периоди, надворешниот дел сега е прекриен со метал и стакло, додека навечер светат LED светла. Во 2018 година хотелот заживеа малку, со помош на LED светлата се прикажува четириминутна програма која ја прикажува историјата на земјата и различни политички слогани.
Хотелот е производ од тензијата меѓу Јужна и Северна Кореја, особено нагласена во периодот на Студената војна. Властите во Северна Кореја сакаа да ја докажат нивната политичка моќ и архитектонска уметност откако Сеул беше домаќин на Летните олимписки игри во 1988 година.
Хотелот требаше да биде подготвен во 1989 година за гости од странство, но тоа никогаш не се случи. Северна Кореја доживеа економски пад откако многу пари беа вложени во изградба на нов стадион и ширење на тамошниот аеродром.
